ആലപ്പുഴ കണ്ണൂര് എക്സിക്യൂട്ടീവ് എക്സ്പ്രസിലെ യാത്രക്കാര്ക്കുനേരെ പെട്രോളിച്ച് തീ കൊളുത്തി യുവാവ്. ട്രെയിനില് തീ പടര്ന്നതോടെ പരിഭ്രാന്തരായി പുറത്തേക്ക് ചാടിയെന്ന് സംശയിക്കുന്ന മൂന്നുപേരുടെ മൃതദേഹം ട്രാക്കില് നിന്നും കണ്ടെത്തി. മട്ടന്നൂര് സ്വദേശി റഹ്മത്ത്, സഹോദരിയുടെ രണ്ടുവയസുള്ള മകള് സഹറ, വ്യാപാരിയായ നൗഫീഖ് എന്നിവരാണ് മരിച്ചത്. ഇവരുടെ മൃതദേഹം കോഴിക്കോട് മെഡിക്കല് കോളജ് മോര്ച്ചറിയിലെത്തിച്ചു. അക്രമത്തില് സാരമായി പരുക്കേറ്റ ഒന്പതുപേര് ചികില്സയിലാണ്.
കണ്ണൂര് പൊന്ന്യം വെസ്റ്റ് സ്വദേശി അനില്കുമാര്, ഭാര്യ സജിഷ, മകന് അദ്വൈത്, പട്ടുവം സ്വദേശി റൂബി, തളിപ്പറമ്പ് സ്വദേശി ജ്യോതിന്ദ്രനാഥ്, പ്രകാശന്, മട്ടന്നൂര് സ്വദേശി ആഷിഖ് എന്നിവര്ക്കാണ് പൊള്ളലേറ്റത്. ഇവര് കോഴികോട് മെഡിക്കല് കോളേജ്, കൊയിലാണ്ടി താലൂക്ക് ആശുപത്രി എന്നിവിടങ്ങളില് ചികില്സയിലാണ്.തലശ്ശേരി, കണ്ണൂര് റെയില്വേ സ്റ്റേഷനില് ഇറങ്ങേണ്ട യാത്രക്കാരായിരുന്നു ഇവര്.
ഇന്നലെ രാത്രി ഒന്പതരയോടെയായിരുന്നു ഡി വണ് കോച്ചില് കടന്ന അക്രമി യാത്രക്കാര്ക്ക് നേരെ പെട്രോള് ഒഴിച്ച് തീയിട്ടത്. അക്രമത്തിന് പിന്നാലെ ചങ്ങല വലിച്ച് ട്രെയിന് നിര്ത്തിയ യുവാവ് രക്ഷപെടുകയും ചെയ്തു. അക്രമിക്കായി പൊലീസ് തിരച്ചില് ഊര്ജിതമാക്കി.