കണ്ണൂര്‍: അധ്യയന വര്‍ഷത്തിന് സമാപനം കുറിച്ച് സംസ്ഥാനത്തെ സ്‌കൂളുകള്‍ ഇന്ന് അടയ്ക്കും. മധ്യവേനല്‍ അവധിക്കായി വൈകിട്ട് അഞ്ചുമണിക്കാണ് സ്‌കൂളുകള്‍ അടയ്ക്കുക. പരീക്ഷകള്‍ കഴിഞ്ഞാലും ഇന്ന് വിദ്യാര്‍ത്ഥികള്‍ക്ക് സ്‌കൂളില്‍ വരാം.
അധ്യാപകരും ഇന്ന് സ്‌കൂളിലെത്തണം. ഉച്ചഭക്ഷണ പദ്ധതി പരിധിയില്‍ ഉള്‍പ്പെട്ട 5 കിലോ അരി വാങ്ങാന്‍ ബാക്കിയുള്ള വിദ്യാര്‍ത്ഥികള്‍ ഇന്ന് തന്നെ കൈപ്പറ്റണമെന്ന് അറിയിച്ചിട്ടുണ്ട്.
പരസ്പരം ചായം പൂശിയും മഷിയാല്‍ സ്‌നേഹവാക്കുകള്‍ വസ്ത്രങ്ങളിലെഴുതിയും സമ്മാനങ്ങള്‍ കൈമാറിയും പ്ലസ്ടു വിദ്യാര്‍ത്ഥികള്‍ അവസാന സ്‌കൂള്‍ദിനം ആഘോഷമാക്കി. മറ്റു ചിലര്‍ കെട്ടിപ്പിടിച്ച് കരഞ്ഞ് വേര്‍പിരിയലിന്റെ വേദന പങ്കുവച്ചു.
എസ്.എസ്.എല്‍.സി, ഹയര്‍സെക്കന്‍ഡറി മൂല്യ നിര്‍ണയ ക്യാമ്പുകള്‍ ഏപ്രില്‍ മൂന്നിന് ആരംഭിക്കും. മേയ് 20നകം ഫലപ്രഖ്യാപനമുണ്ടാകും.
