കോഴിക്കോട്∙ സ്വർണക്കടത്ത് കേസ് അട്ടിമറിക്കാൻ സംസ്ഥാന സർക്കാർ ശ്രമിക്കുന്നുവെന്ന് ബിജെപി സംസ്ഥാന പ്രസിഡന്റ് കെ.സുരേന്ദ്രൻ. ഇതിനായി മുഖ്യമന്ത്രിയുടെ നേതൃത്വത്തിൽ വൻ ഗൂഢാലോചന നടത്തി. രഹസ്യമൊഴിയുടെ അടിസ്ഥാനത്തിൽ കേന്ദ്ര ഏജൻസികൾ മുഖ്യമന്ത്രിയെ ചോദ്യം ചെയ്യണം. സ്ഥാനം ഒഴിഞ്ഞ് മുഖ്യമന്ത്രി അന്വേഷണത്തെ നേരിടണം.
മടിയിൽ കനമില്ലെങ്കിൽ അന്വേഷണത്തെ ഭയക്കുന്നത് എന്തിനാണെന്നും കെ. സുരേന്ദ്രൻ ചോദിച്ചു. സത്യം അധികനാൾ മൂടി വെക്കാനാവില്ലെന്നും ജനാധിപത്യത്തിൽ സത്യം അറിയാൻ ജനങ്ങൾക്ക് അവകാശമുണ്ടെന്നും മുൻ മുഖ്യമന്ത്രി ഉമ്മൻചാണ്ടി പ്രതികരിച്ചു. ഇതിനിടെ, മുഖ്യമന്ത്രിക്കെതിരെ യുഡിഎഫ് പ്രക്ഷോഭം ശക്തമാക്കി. കലക്ട്രേറ്റിലേക്ക് നടത്തിയ മാർച്ച് പല ജില്ലകളിലും സംഘർഷത്തിൽ കലാശിച്ചു. പലയിടങ്ങളിലും ബിരിയാണി ചെമ്പുമായാണ് പ്രതിഷേധം സംഘടിപ്പിച്ചത്