എറണാകുളം: ഡീസല്‍ വില വര്‍ധനക്കെതിരെ കെഎസ്ആര്‍ടിസി സമര്‍പ്പിച്ച ഹരജിയില്‍ ഹൈക്കോടതി ഇടക്കാല ഉത്തരവ് പുറപ്പെടുവിച്ചില്ല. വില വര്‍ധന സ്റ്റേ ചെയ്യണമെന്ന ആവശ്യവുമായാണ് കെഎസ്ആര്‍ടിസി ഹൈക്കോടതിയെ സമീപിച്ചത്. എന്നാല്‍ ഈ ആവശ്യം ഹൈക്കോടതി തള്ളുകയായിരുന്നു.
എണ്ണക്കമ്പനികളുടെ നടപടി കടുത്ത വിവേചനമാണെന്നും, വലിയ സാമ്പത്തിക ബാധ്യത സൃഷ്ടിക്കുന്നതായും കെഎസ്ആര്‍ടിസി വാദം ഉന്നയിച്ചു. ദിവസ ഷെഡ്യൂളുകള്‍ പ്രവര്‍ത്തിപ്പിക്കാന്‍ 300-400 കിലോ ലീറ്റര്‍ ഡീസല്‍ വേണ്ട കെഎസ്ആര്‍ടിസിക്ക് ലീറ്ററിന് 21 രൂപ നിരക്കില്‍ അധികം നല്‍കേണ്ടി വരുന്നത് വലിയ നഷ്ടം സൃഷ്ടിക്കുമെന്നും കെഎസ്ആര്‍ടിസി കോടതിയില്‍ വ്യക്തമാക്കി.
എന്നാല്‍ വിലനിര്‍ണയം അടക്കമുള്ള നയപരമായ കാര്യങ്ങളില്‍ കോടതി ഇടപെടരുതെന്ന് കേന്ദ്രസര്‍ക്കാര്‍ ആവശ്യപ്പെട്ടു. അതേസമയം വില നിര്‍ണയ സംവിധാനം സംബന്ധിച്ച് രേഖാമൂലം നിലപാട് വ്യക്തമാക്കാന്‍ എണ്ണക്കമ്പനികളോട് കോടതി നിര്‍ദ്ദേശച്ചു
